Cânını terk itmeyen cânâna olmaz âşinâ

Yanmayınca şem’ ile pervâne olmaz âşinâ

Derd-i hecre düşmeyenler ‘ışkdan bîgânedür

Bî-vesîle her kişi sultâna olmaz âşinâ

Rişte-i peyvend nâgeh kişiye pâ-bend olur

Ol sebebden âdeme dîvâne olmaz âşinâ

Sûret-i mihrin görüp çarhun sakın aldanma kim

Gâfil olma kimseye bîgâne olmaz âşinâ

Sâkiyâ ol yâra mey sun ‘âşk-ı gam-hâr ile

İçmeyince bir iki peymâne olmaz âşinâ

Ey perî bîgâne-veş bizden kaçar mısın didüm

Naz ile didi perî insâna olmaz âşinâ

Vahşet eyler âsitânun itleri İshâkdan

İzzet ehli bî-ser ü sâmâna olmaz âşinâ.